E curpa di sr. Croes ta e prome curpa sin bida cu a wordo treci den cas di cultura pa un despedida asina. Den un tempo sumamente cortico, Departamento di Cultura a pone hunto un show di despedida pa sr.Croes. E show aki tabata inclui diferente presentacionnan di diferente gruponan local . Como tambe videonan di sr. Croes su propio shownan. Un dia agridulce unda cu publico presente por a disfruta di sr. Croes su talento un biaha mas como tambe tuma despedida y duna condolencia na su familiarnan y sernan keri.

Discursonan
Diferente persona a bin dilanti pa comparti storianan y discurso tocante sr. Croes. Incluyendo director di Departamento di Cultura esta Siegfried Dumfries y tambe minister di Cultura Otmar Oduber. Agrupacionnan musical presente tabata inclui Mariachi Perla, Janiro Eidsen, Grupo Cakiña y algun mas.

Biografia sr. Croes
Di parti Departamento di Cultura, a trece dilanti e biografia di sr. Croes.
E departamento ta conta cu Rudolfo Valentino Croes, miho conoci como Vale, e Arubiano Original a fayece. Vale Croes despues di a haci un operacion y a keda mas cu dos luna na Colombia. Tabata diasabra ultimo cu el a regresa Aruba pa dialuna 6 di april ta bin ta fayece.
E noticia a cay di sorpresa pasobra no tabata algo cu nan lo a spera. Vale Croes a nace riba un dialuna dia 5 di november 1951 y el a biba te cu su 22 aña na Pos Chiquito # 77. Di chikito el a bay scol na Savaneta, e tempo ey bewaarschool cerca Juffrouw Nidia Kock.
Na 1958 na Sint Antonius School Savaneta Vale a cuminsa canta riba koor di misa Sagrado Curason bou direccion di Sra. Carmen de Kort net nan a caba di traha e misa. Na Sagrado Curason Vale a sirbi misa tambe como misdienaar. El a canta den koor y tambe como solista.
Ta hopi cantica tabatin e tempo ey, pero di e canticanan ey ta un so Vale ta corda; “Ave Maria”. Despues Vale a cuminsa e mesun aña cu comedia na scol. Algun sketch chikito y asina cada aña tabata hunga obranan chikito.

Obra grandi di teatro
Ta na aña 1961 cu Vale a hunga den un obra grandi di teatro cu yama: “Prinses Rozelijn en de Boze Zigeuners”. Esaki a wordo presenta na Rapid Club, na Savaneta cu e tempo ey tabata e club cu bo por a haci teatro masha bon mes den dje. Vale a bay na diferente Clubnan di scol pa haci obranan di teatro. El a sigui cu su rasgonan di haci pret na scol cu e muchanan, Juffrouw, Meneer y Frèrenan t’asina e fama di e mucha pret a nace. Na 1966 El a caba scol basico y a bay scol di ofishi na San Nicolas, esta Martin Luther King School den e klas di carpinteria. E mesun aña Vale a cuminsa canta cu Mariachi Perla di Aruba bou direccion di Sr. Esy Croes, e tempo ey. Vale a canta 4 aña cu Mariachi. Riba e mesun aña ey 1966, Vale ta biaha pa Corsou y tambe Boneiro y a sigui bay tur dos pais te cu e dia di awe.
El a caba LTS na aña 1969 cu getuigschrift di Timmerman.Su prome trabou tabata na Bosch Plastics ganando 1 florin pa ora.

Show di Vale
Na 1971 El a bay Hulanda pa studia e materia di “Fiberglass”. Na 1972 Vale ta bini bek y el a sigui canta y na 1973 el a drenta den e banda musical “Sensacion del Caribe” y despues el e forma parti di diferente banda y mariachi. Na 1973 El a subi tarima pa prome biaha den e club Connie Francis, na Santa Cruz pa conta chiste y eynan e popularidad a cuminsa.
Na 1974 El a sali Pancho di Coriente hunto cu Robby Jansen como Prins Lenga. Vale a sigui canta cu “Sensacion del Caribe” te na aña 1980.

Na 1979 El a sali Prins der Prinsen. Na 1980 el a traha pa ocho luna cu Meta Corporation, como guia di turista. Na aña 1981 cu El a cuminsa traha den gobierno y na 1981 el a cuminsa cu shownan den Cas di Cultura. Cuanto no ta corda e “Show di Vale” y tabata haciendo e shownan aki te cu recientemente.

Receso y reconocemento
Tabatin un receso di 2001 te cu 2009 pa Aruba, pero na Corsou, Boneiro, Sint Maarten, y Hulanda Vale a sigui cu su Show. Na 2004 Vale Croes y Robby Jansen a bolbe conkista e titulo di Prins der Prinsen. Remarcabel ta cu Vale ta e unico comico di Aruba y awor e ta entrenando un par di muchanan homber cu pronto lo tuma e rienda di su shownan.
Na november di 2011 Vale ta cumpli e bunita edad di 60 aña. Mester bisa acerca cu na Corsou y Aruba Vale ta invicto den su comicidad. Te ainda no tin ningun hende pa gana e den comicidad. Vale ta nos artista number uno den comicidad y orguyo di Aruba. Unda cu el a bay e ta laga un stempel graba den curason di su fiel siguidonan y semper a mantene e nomber di Aruba den laira aya, hoben y grandi, hende muhe y hende homber. Tur ta stima e Arubiano Original cu yama Vale Croes. Vale ta baha cu pensioen y ainda ta preparando su Show un biaha mas “Bahando cu Pensioen”.

Vale a ricibi e premio di Dia Mundial di Teatro riba 27 di maart 2011 como actor, su trayectorio y contribucion riba tereno di teatro y comicidad tanto local como internacional.
Nos por bisa cu Vale tin como 54 aña den canto, 34 aña haciendo su shownan humoristico Show di Vale y cu diferente tema. El a baha pensioen na 2011 cu 30 aña den servicio di Gobierno. Vale Croes tabata un gran baluarte, exponente cultural, humoristico, cantante y actor comico cu ta bay laga nos.

Bon Dia